Max-Ophüls-Platz

49.234751, 6.999762

Sabine Göttel

Sabine Göttel

wurde 1961 in Homburg/Saar geboren und lebt in Hannover. Sie studierte Deutsche und Französische Literaturwissenschaft an der Universität des Saarlandes und promovierte über Marieluise Fleißer. Während ihres Studiums nahm sie regelmäßig an Arnfrid Astels Literaturseminar Selber schreiben und reden teil (Saarbrücker Schule).
Sie leitete das Studententheater THUNIS und arbeitete als Regieassistentin am Saarländischen Staatstheater. Nach ihrer Zeit als wissenschaftliche Mitarbeiterin am
Germanistischen Institut der UdS und einem Praktikum am Deutschen Theater Berlin ging sie als Schauspieldramaturgin an die Theater in Hildesheim und Göttingen.
Derzeit arbeitet sie als freie Autorin, Dramaturgin, Lektorin und Dozentin für Literatur und Theater
in Hannover, u.a. an der Leibniz Universität Hannover und an ihrer 2009 zusammen mit Christina Rohwetter gegründeten Akademie Literatur&Leben.
2019 war sie Stipendiatin des Printemps Poétique Transfrontalier.
2022 erhielt sie den Kurt-Sigel-Lyrikpreis des PEN-Zentrums Deutschland. Sabine Göttel ist Mitglied des Verbands deutscher
Schriftstellerinnen und Schriftsteller und des deutschen PEN.
1987 erschien ihr erster Gedichtband Fische Fluten im St. Ingberter Röhrig Verlag. Es
folgten die Erzählungen Die lustige Witwe (2001) und Rückreise (2002), das Hörspiel Sissi
ist zurück! (2008) sowie die Theaterstücke Bad Baby’s Bed (2002), Die Walsche (2010),
Die Bergprinzessin (2011), Eisenheart (2012) und Nichts zu verlieren (2014).

Sabine Göttel ist mit ihren Texten in zahlreichen Anthologien, Zeitschriften und im Rundfunk
vertreten, u.a. Signum, Kalmenzone, Versnetze, poetenladen, fixpoetry, wortschau,
paraple. Im Röhrig Verlag erschienen zuletzt die Gedichtbände Geister (2020) und Im
Gefieder (2022).

Foto:© Janko Woltersmann

https://www.litcast.net

www.sabinegoettel.de

Iwwerall Sympadisande

Verzisch Johr! Ehr liewe Leit! So lang isses jetzt her, dass die ganz Ufreeschung war wäe de RAF.Ich wäß noch genau: Iwwerall Sympadisande! Das heeßt, iwwerall ware Leit, wo in jedem, der e bissje annerscht ausgesieh hat wie se selwer, e gefährlicher Sympathisant gesiehn hann.Nadeerlich a in uns un unserer WG. Was soll ich saan: Mir hann die beese Blicke ausgehall un hann in Ruh weiderstudiert domols in Saarbrigge, un so lang mir uns net ausm Nauwieser Verdel erausgewaacht hann, war a alles gut. Awwer wehe, mir hann wolle Zigaredde kaafe!Jetzt werre ner saan, ei Zigaredde, die gebbds doch an jeder Eck, sogar im Verdel. Wieso solln das uffreeschend sinn? Ei, dodezu muss mer wisse, dass mir immer no Frankreich riwwer sin fer Zigarette se kaafe. Bei uns in de WG ware e paar starke Raucher, vor allem die Männer. Unner Gitanes maïs hannses net gemach. Wisse ner noch? Gitanes - das sinn die franzeesische,raaweschwarze Kippe in der scheene blaue Verpaggung mit der Zischeinerin – sorry, das derf mer jo heit nimmie saan – also, met der Sintezza in de Rauchschwaade druff. Ich hann immer gefunn, dass das die schenscht Zigareddepaggung uff de Welt iss. Mer hat se net uffgeress, sondern wie e Schublad uffgezoh! Uff un widder zu, zu un widder uff. Das is halt äschde französische Eleganz, sowas kannschde bei uns lang suche! Gitanes maïs widderum, die Favoridde vum Stefan un vum Mardin, ware schun aa Gitanes, awwer met some gelwe Maisblatt drumrum -, ohne Filder, vesteht sich. De Stefan hat gesaat, dass de schwarze Tabak durch denne angesteckde Mais noch besser rinhaut, deshalb breicht er insgesamt net so viel se raache. Das wär gesünder, un billicher wärs dodedurch a. Do fallt mer in: Ich glaab, die derfe heitzedaas in Deitschland gar nimmi verkaaf werre. Domols jedenfalls, in de Achtzicher, hat se se noch gebb bei uns, awwer in Frankreich ware se halt billicher, weshalb mir - un jetzt kumm ich endlich uff mei Ausgangspunkt zerick - halt immer iwwer die Grenz no Forbach gefaahr sin ins nägschde tabac. Mir hodde jo kaum Geld domols, als arme Studend:inne in Saarbrigge. Die reeschelmäßische Zigareddefahrde no Forbach ware so was wie e Highlight in unserm WG- Läwe. De Mardin hot sich nämlich, korz bevor in Frankreich die endgildisch ledschd vum Band gelaaf is, noch e Ent zugeleet. Jo genau: e Zwä CV! Odder fer all diejenische, die Franzeesisch schwätze: e Deux Chevaux! Nä, nä, net gebraucht! Fungelnachelnei war se, em Mardin sei Ent, un ganz weiß! Jedenfalls die erschd Zeit. Er hat lang gespart gehatt, um sich denne Traum se erfille. Zehndausend Margg hat se gekoschd un ganz verrickt warer met der Karre! Wenn er owends alsemol kee Parkplatz direkt vorm Haus gefunn hat, isser naachts allegebott durchs Verdel gelaaf fer se gugge, ob se noch do war. Mir sin also meischdens medm Mardin un seiner Ent no Forbach gefahr. De Mardin un de Stefan vorne, weil de Mardin am Steier war un de Stefan die längschde Bään hot vun uns, un die Fraue - es Birgit un ich - wie sichs domols geheert hat, hinne drin. Meddere Ent se fahre - heitsedaas kann sich kee Mensch meh vorstelle, was das ferre Gefiehl war! So e bissje wie uffeme fahrbare Trambolin, däd ich saan. Es hat ununnerbroche geschaugelt! Wenn de Mardin e bissje flott in die Kurv gefahr is - wasser zimlich gäre gemach hat, wenner Beifahrer:inne debei hot - hammer effdersch nur uff zwä Rädder geschdann. Uff de zwä rechde in de Rechtskurv un uff de zwä linge in de Linkskurv. Die Beifahrer:inne hann sich dann, ganz audomadisch in die entgejegesetzte Rischdung geleet. So was nennt mer, glaawisch, ausgleichende Gerechtigkeit. Sorry, bleeder Scherz! Awwer, bei links un rechts fallt mer in, dass ich jo gar kee Abhandlung iwwer die Merkwürdischkeide vunnere Ent schreiwe, sondern was ganz anneres vezehle wollt. Also: Wie mer ämol widder se viert Rischdung Grenz unnerwägs ware, hann se uns an de Golden Bremm net, wie sunscht immer, nome lange, drohende Blick ins Audo un in die Aue durchgewunk. Nä, nä, sellemols wars ganz annerscht; das häßt, erschtemol wars wie immer. Denne beese Blick hoddese diesmo aa druff; awwer denne hammer jo schun gekennt un uns nix debei gedenkt. Un de Franzos vun denne zwä Uniformierde wollt grad, wie immer, die Hand heewe un wingke, un dodenoo wollt de Mardin a wie immer meddeme freindliche Koppnicke weiderfahre. Awwer jetzt kummts: Kummt doch der deitsch Grenzbulle, so e junger, gladdischer Typ, ausm Hinnergrund, stellt sich vor sei Kolleesch an die Dier, gebtm Mardin ze vesteh, dass ers Fenschder hochklabbe soll un saat: "Fahren Sie bitte da vorne rechts an die Seite und warten Sie im Wagen.Hä? Was hattn das jetzt gesollt? Mir hann uns korz angeguckt und hodde, ich schweers, alle vier fer e Segund die Idee, dass mer änfach Gas gewwe und durchfahre sollde, ohne anzehalle bis Forbach, direkt vor die Dier vum tabac! Awwer nur fer e Segund. Dann hammer nämlich die Muffe kriet un hann scheen gemach, was der Bulle gesaat hat. Weil, ihr Leit, es ware die Achtzischer! Iwwerall Sympadisande un die Stadt vollgeplaschdert met RAF-Plakade! Lauder junge, zum Däl guud aussehende Leit met grimmische Gesichder! Vorsicht Schusswaffen!Nochdezu hot die RAF in demm Johr grad widder drei Leit ermordd, und die Bulle hotte seitdem noch keinen nennenswerten Fahndungserfolg se verzeichne. Erschd zwä Daa vor der besaade Zigareddefahrt war das meddem von Braunmühl basseert, un die Bolizei hodd mo widder kee Schimmer vun de Täder. Keen Wunner, dass die schlecht druff ware, besonnerscht die an de Grenze, also a in Saarbrigge. In all der Uffreeschung ware mir vier Geschdalde nadeerlich besonnerscht vedächtich. Ich saan nur: guud aussehende Leit met grimmische Gesichder! Jetzt mo im Ernschd: Die Bulle frooe sich doch: Was mache vier gesunde Studend:inne am hellichte Nomiddaa innerer weiße Ent ohne Gepäck am Grenziwwergang no Frankreich? Warum hocke die net in de Uni und studiere? Sacke monatlich es Geld vum Vadder in un gewwes aus fer die Zerschlaachung des Syschdems, statt aus ihrm Läwe un dem Geld was Ordentliches ze mache! Un wie se schun do drin hocke in derer Kischt: Vorne zwä Tybbe met lange Hoor, das geht jo noch, das sieht mer jo heit alle Daa, awwer hinne die zwä Geschdalde met de korze Stoppele, was soll das dann sin? Rischdische Fraue bestimmt net, eher so e Art Feminischtinne odder Flindeweiwer. Ehr halle solche Iwwerleeschunge fer iwwertrieb? Also, ich wäß jo net. Mer muss sich doch nur die Verännerung angucke, die es Ulrigge Meinhof durchgemach hat; ich menn, rein äußerlich schun. Wies in de sechzischer noch im piekfeine Blankenese Hof gehall hat, hats noch e braver Paascheschnitt gehatt. Awwer dann, als ferdischie Terrorischdin bei der Feschtnahme in Hannover: Raschpelkorze Hoor, e vezerrtes Gesicht un im Schminkkoffer e Bomb! Das allerselwe beim Gudrun Ensslin: Zeerscht hats met scheene lange, blonde Hoor vor Gericht wie verrickt mem Baader geflirdet un war irschendwie immer noch e klän Mäde un die brav Parrersdochder, obwohls domols jo schun kräftich in de Kaufheiser gezündelt hot. Wies Rotkäppche un de Wolf, die zwä! Un e paar Johr un etliche Aanschläsch später hängts Gudrun in Stammheim als alt Fraa met vestruwwelte korze Fransele am Strick! Ich sahn eich: Genau das muss dem gladdisch deitsch Grenzer durch de Kopp geschoss sin, wie er ganz roudinemäßisch hinne innem Mardin sei Ent geguckt und es Birgit un mich gesiehn hat. Wahrscheinlich sin mir zwä in unsere Latzhose iwwerhaupt Schuld gewän, dass mer han misse rechts ranfahre. 
"Fahren Sie bitte da vorne rechts an die Seite und warten Sie im Wagen."; Wie gesaat, das hammer dann a gemach. Vor allem gewaat. Die Bulle sin un sin net kumm. Es hat awwer net lang gedauert, un die Fenschder vun de Ent ware angelaaf. Es war jo Ogdower, un mir hann de Modoor un die Heizung aus Umweltgründe net angemach. Die ganz Zeit hat kee Mensch was gesaat. Awwer mer konnt förmlich heere, wie uns all die Bumb gang is. Mer weeß, vielleicht hodde die inzwische schun es SEK alarmiert oder de Verfassungsschutz? Irschendwann hats Birgit dann die Geduld veloor und hat no vorne gepischpert, wies wär, wenn mir jetzt änfach de Modor starde und abhaue däde iwwer die Grenz no Frankreich. Mir hädde uns jo nix vorzewerfe, was kennt uns schun bassiere? Das met der Warderei wär doch nur Schikane, scheiß Bolizeistaat unsoweider. Do hats pletzlich ans Fenschder geklobbt; un wie de Mardin uffklappt, guckt der gladdisch Grenzer frech ins Audo und saat in die Runde:Ihre Ausweispapiere bitte! Personalausweise, Führerschein, Zulassung! De Mardin hat ganz zidderisch im Handschuhfach gesuucht un gottseidank sei Babiere fix gefunn, un mir annere hodde unser Persos wie durch e Wunner a all debei. De Mardin hat dann alles ingesammelt un dem Bulle gebb, un der hats seim Kolleesch no hinne weidergereicht. Jetzt erscht hann ich durch die milchische Scheiwe gesiehn, dass do noch jemmand war, nämlich der dabbisch Franzos, der anscheinend voll unnerm Schlabbe vun seim deitsche Kolleesch geschdann hat un uns desweje net allän durchwinge konnt. De Franzos also ab met unsere Ausweise. Das häßt, halt! Sei deitscher Chef nämlich saat pletzlich zum Mardin: "Herr Neumann, steigen Sie bitte aus und kommen Sie mit";, un wie der Mardin met schlodderische Knie die Dier uffmacht und e Schwall frischie Luft ins Audo kummt, siehn ich, dass der Deitsch em Mardin sei Labbe und die Babiere in de Hand hat. Die sin dann se zwett abgezoh, awwer net weit, weil mer hat trotz angelaafener Rickscheib ihr Umrisse hinne am Audo erkenne kenne. De Stefan als:" Mir misse aa aussteije, mir kenne doch denne Mardin net allän losse, mir misse doch solidarisch sin!"; Un wie mir als erumdiskudiere iwwer die rischdisch Reddungsstradegie un es schun anfangt, dungel zu werre, geht die Fahrerdier pletzlich uff un unser Persos fliehe no hinne. De Mardin steid in, setzt sich ans Steier, dreht de Schlissel erum un de Modoor fangt aan se tuggere. Kein einzisches Wort hat der Mardin geschwätzt, bis mer vorm "tabac"; angehall an. Dann hadder ganz trocke gesaat: 
"Es linge Ricklicht is kabutt un ich solls umgehend rebariere losse"; Mir han dann jeder e Stang Gitanes kaaf un sinn ohne Probleme widder iwwer die Grenz kumm. Awwer hääm wollde mir dann noch net. Un hann gemach, was mer immer gemach hann, wenn mir todal ferdisch ware weje irgendwas. Mir sinn Richdung Saarlouis uff die Autobahn gefahr un hann uns uffeme Raschdplatz in de Näh vun de Dillinger Hitt de Abstich angeguckt. Hat das jemmand vun Eich schunnemol gesieh? Viel Geleeschenheide gebbts dodezu nimmie, weil jo än Hitt no de anner zugemach hat. In de Achtzischer hats im Saarland awwer noch e paar gebb, unner annerem in Dillinge. So e Abstich ze siehn is werklich einmalich, besonnerscht, wenns schun dunkel is. Wie aus de Wolge gegoss strömt das Feier mitte ausm Himmel uff die Erd. Ich kann gar net saan, wie guud das duud! De Stefan hat in seim Philosophekopp emol gesaat, der Anblick hätt "eine kathartische Wirkung". Das häßt soviel wie: Wemmer sieht, met wasferer Gewalt das Feier uff die Erd fallt, braucht mer sich nur vorzestelle, dass es alles, was em bedrickt un was mer los werre will, unner sich begraabt. Un dann gehts em schun besser! Ihr kennes glaawe odder net: An demm Daa, an demm Owend uffm Raschdplatz an de A8 hann ich zum erschde Mol begriff, was die RAF eigentlich umtreibt - ich menn, wenn net alles so ferchterlich schief gelaaf wär met denne Morde un so: Nämlich gar net so viel anneres wie uns! Awwer wenn ich genau driwwer nodänge, heit, no all denne Johre, kennt de eenzich Unnerschied do drin gelää hann, dass die RAF-Leit net nur Zigaredde hole wollde. Wäß mers?